ఇంకిదే నా చివరి ప్రయత్నం దీని తరువాతే నా చావు గురించి ఆలోచన
ఆయనని ముట్టుకోవాలి .. ఎలా అయిన సరే
అంత జనసంద్రంలోంచి ఆయనను చేరుకోవాలి
ఎలా ఆయనని చేరేది ?
నా చివరి ఆశ కోరిక ఇక ఆయనే కదా
పండ్రెండు సంవత్సరాలుగా
కడుపులో పెళ్ళుబుకుతున్న
రక్తపు అగ్ని పర్వతాలే
కడుపు కోత ,పేగుల మెలివేత
క్షీణిస్తున్న బలం ,
అడుగువేయలేని అసహాయత
పాదాలపై పట్టులేని వణుకు ఎక్కిరింత
నలుగురికి దూరంగా నన్ను నేనే వెలివేసుకునే
నిస్సహాయత
నన్ను నేనే అసహ్యించుకుని ,
కాలాన్ని నిందింస్తూ..
లోకపు వెలిచూపుల ముళ్ళ మధ్య
నలిగిపోతున్న నా తనువు
జీవచ్చవపు చేప ఎదురీత
మొలకెత్తిన చిన్న విశ్వాసపు ఆశ ఆయన రాక వినగానే
నవనాడులన్ని శక్తినింపుకుని
విశ్వాసం చిగురు తొడిగి పచ్చగా
నాలొ ఉత్సాహం నింపి ముందుకు తోసింది
వేవేల జనాల మధ్యనుంచి అందరిని తోస్తూ
ముందుకు అడుగేసా
ఆయన వెనకే నేను ,ఆ మూర్తిభవించిన
అద్భుత ప్రేమమూర్తి వెనకే నేను
శక్తినంత కూడగట్టుకుని , వణుకుతున్న చేతులతో
తన ప్రశస్త వస్త్రం మెల్లిగా ముట్టుకున్నా
అంతే ...
నరనరాల్లో జీవం పెల్లుబికింది
కడుపులోని రక్తపు లావా ప్రవహించడం ఆగిపోయింది
కొత్త శక్తి నా తనువును నింపి
యవ్వనపు ఉత్సాహం తిరిగొచ్చింది
డబ్బు ఖర్చు చేసి స్వస్థపడగలనని భ్రమపడి
వ్యయపర్చుకున్న రోజుల మూర్కత్వం పటాపంచాలయింది
ఆయన వస్త్రాలలోని ప్రభావమే నా రక్తస్రావ రోగాన్ని
బాగుచేసి ,ఆయన దైవత్వాన్ని నాకు బయల్పరిచింది
ఆ క్షణమే సమర్పించుకున్న నా జీవితం ఆయనకీ
ఉండలేనని అర్ధమయింది ఆయన స్వరం వినలేని రోజు నేనని
నా సర్వస్వం ఇక యేసయ్యే అని
నా జీవితాంతం ఆయనకు సజీవ సాక్షినని
BY -Mercy Margaret
