నెట్టివేయబడ్డప్పుడు 

త్రోసి వేయబడ్డప్పుడు 

అణచివేయబడినప్పుడు 

తృణీకరించబడ్డప్పుడు 

సమాజం దూరంగా ఉంచి నీకు దేవుడు లేడన్నప్పుడు 
ఆయన వచ్చాడు

కేవలం నా కోసం వచ్చాడు

నా లాంటి వాళ్ళ కోసం వచ్చాడు 

చీకటిలో నడిచే జనులకు గొప్పవెలుగుగా
మరణచ్ఛాయగల దేశ నివాసుల మీద ప్రకాశించే వెలుగుగా
గ్రుడ్డివారి కన్నులు తెరవడానికి
బంధింపబడినవారిని చెరసాలలోనుండి వెలుపలికి తేవడానికి
చీకటిలో నివసించే వారిని బందీగృహములోనుండి
వెలుపలికి తెచ్చి జీవమవడానికి
ఆయన వచ్చాడు

ఆకాశ మహాకాశాలు పట్టజాలని దేవుడు
తల్లికడుపులో పిండమై , మాంసమై , మనిషై
లోక పాపములు మోసుకొని పోవు దేవుని గొర్రెపిల్లై వచ్చాడు

దేవుడు లేని నాకు దేవుడైయ్యాడు
దేవుడే నాకు స్నేహితుడయ్యాడు
నన్ను తనలో ముద్రించుకున్నాడు
నా పాపాన్ని సిలువకు కొట్టి
పరమ రాజ్యానికి నన్ను వారాసురాలిని చేసాడు

నా తలపైకెత్తాడు
నా కాళ్ళను లేడి కాళ్ళ వలె చేసి ఎత్తైన కొండపై
నన్ను నిలబెట్టాడు
తన చేతులలో నన్ను చెక్కుకున్నాడు

| నా దీపమును వెలిగించువాడు | Mercy Margaret 
--------------------------------------------------------------
నీ గురించి పాడటానికి నా దగ్గర ఒక్క కొత్తపాట లేదు 
నీ గుమ్మంలో ప్రవేశించక ముందు 
వెలుగునదిలో నువ్వు నన్ను ముంచి తీసాకా 
పాతపాటలతో నిన్నెలా చేరను ?

నా దారిపొడవునా 

చెట్లకొమ్మలు రోజూ కొత్తపాటలను 

పూయించి నీ సన్నిధికి పంపడం చూసాను
ఆకాశంలో చంద్రుడు నక్షత్రాలను
రోజూ ఓ కొత్తపాటతో వెలిగించడం చూసాను
నీ పేరు రాసున్న ప్రతి చోట కొత్త సంగీతం నదులై
ప్రవహించడం చూస్తున్నాను
అంతేనా
తల్లి పిచ్చుక తన చిట్టిపిచ్చుకకు నీ స్తుతికీర్తన
నోటికందిస్తుంటే
నా నోట ఏ పాట లేదని చింతిస్తూ వచ్చాను

నీ గుమ్మంలో ప్రవేశించాక
తేజోమూర్తి ..!!

కోటిసూర్యప్రకాశుడా ..!!

నా మనో నేత్రాలు వెలిగించబడ్డ క్షణాన
కొత్త పాటొకటి నాలోంచి ఇప్పుడే పుట్టింది
కొత్త రాతిని
కొత్త పేరొకటి నువ్వు నాకిచ్చిన ఈ క్షణాన
వెలుగువై నీవు నాలో నిండిన క్షణాన ఇప్పుడే తెలిసింది

నీ సన్నిదే నాకు దీపావళని
నీవు నాతో ఉన్న ప్రతి క్షణం
నే దీపమై వెలుగొందుతానని .

-------------- 22/10/2014 -----------

2కోరింథీయులకు 4:5 _"అంధకారములోనుండి వెలుగు ప్రకాశించును గాక అని పలికిన దేవుడే తన మహిమను గూర్చిన జ్ఞానము యేసుక్రీస్తునందు వెల్లడిపరచుటకు మా హృదయములలో ప్రకాశించెను."

ఎఫెసీయులకు 5:9 _"వెలుగు ఫలము సమస్తవిధములైన మంచితనము, నీతి, సత్యమను వాటిలో కనబడుచున్నది."

| బలమైన దుర్గము| Mercy Margaret
----------------------------
నీ పేరుందంటావ్ నాకు తెలుసు..!

అందరూ విడిచి 
చీకటి ముసురుకునే వేళ

ఏ అరణ్యమో తెలియని చోటు నుండి
భయంకర శబ్ధాలు వినవస్తూ
ఒంటరిగా ఉన్న గుహలో
నా ఎదురుగా పేరు తెలియని 
జంతువులు హేళనగా
ఆకలిగా తిరిగే వేళ

నీ పేరుందంటావ్
నాకు తెలుసు..!

ఎవరూ కట్టలేని అధ్బుతమైన
కోట
ఎవరూ ఎక్కలేని ఎత్తైన కొండ
బాహువులు చాచి ఎదురు చూసే
నీ పేరే నాకు ఆశ్రయమవ్తుందని
నువ్వు ముందే చెప్పావ్

అయినా నా చెవుల్ని
మనసుని స్వాదీనం చేసుకున్న
దుష్టుడిని ఈ క్షణమే
నీ నామంతో ఓడించి
హృదయం చేతిలోకి తీసుకుని నీ పేరులోకే
వస్తున్నా
నువ్వే నా ఎదురుగా ఉన్నాక
వినలేని చెవులు నాకెందుకు?

------------ (10/5/2014)---------------

సామెతలు 18:10 యెహోవా నామము బలమైన దుర్గము. నీతిమంతుడు అందులోనికి పరుగెత్తి సురక్షితముగా నుండును.

కీర్తనలు 31:3 నా కొండ నాకోట నీవే నీ నామమునుబట్టి త్రోవ చూపి నన్ను నడిపించుము నా ఆశ్రయదుర్గము నీవే. 

|మేఘా రూఢుఢ రమ్ము| Mercy Margaret
------------------------------------
చీకటి ముంచుకొస్తుంది
భయం తరుముకొస్తుంది
ఈ దేశం నాదికాదని
నా అస్థిత్వం కోసం చేస్తున్న యుద్దాన్ని
గేలిచేస్తూ వెక్కిలిగా నవ్వుతుంది

ఓట్లకోసం సెక్యులర్ ముసుగు తొడిగిందేమో
అక్కడక్కడ చినిగిన ముసుగులోంచి
నా వాళ్లను నిలువునా కాల్చిన దృశ్యాలు
కత్తిపోట్లతో నిట్టనిలువునా చీల్చిన
రక్తపు చారలు కనిపిస్తున్నా
అమాయకత్వాన్ని
కొని, ముఖానికి అంటించుకుంటున్న దాన్ని
నమ్మిన
నా తోటి గొర్రెలకు
రాబందదని ఎలా చెప్పాలి

నా గొంతుకు వోట్ల కోసం చేసిన
తోడేల్ల గాయాలు
సమూహంగా నన్ను అంతం చేయాలని
వారు అరిచే అరుపుల్లో
నేను మీ మట్టి వాన్నే
నా ఉనికి ఈ నేలదే
మీరంతా నా మనుషులే అన్న
నా గొంతెందుకో వారికి వినబడదే??

చీకటి ముంచుకొస్తుంది
భయం తరుముకొస్తుంది
ఈ దేశం నాది కూడా అని అరిచే కొన్ని
శరీరాలు తగలబడుతూ
రక్తం చిందించనీ ....!
విత్తనాల్లా మారుతున్న వారి తెగువ వెనక
విస్తారంగా ఎదిగే పంటను త్వరలోనే
చూస్తారు
చీకటిని చీలుస్తూ
మధ్యాకాశంలోకి
కొదమసింహం తిరిగిరాబోతుంది

ఇదిగో ఆయన మేఘా రూఢుడై వచ్చుచున్నాడు; ప్రతి నేత్రము ఆయనను చూచును, 

ఆయనను పొడిచినవారును చూచెదరు; 

భూజనులందరు ఆయనను చూచి రొమ్ము కొట్టుకొందురు; అవును ఆమేన్‌.!!!!
-------------------------- ( 17/5/2014)-----------------

|| నాతో నేనుకాసేపు || By mercy margaret
-----------------------------------------------------
ఎన్ని ఉదయాలో
ఎన్ని ఆలోచనలో
ఎన్ని ఆప్యాయతల మేలుకొలుపులో

ఒక్కో రోజు వెనకేసుకుంటూ ముందుకెల్తూ
మళ్లో ఉదయాన్నే తిరిగి దేహంలోకి 
ప్రవహించి

నిద్రలోంచి తెరచిన కళ్లతో
ఒక నిమిషం శూన్యంలోకెళ్లి

ఈ రోజెంత ఖరీదో నన్ను నేను
ప్రశ్నించుకుని
చేతులు మోడ్చి
మోకరిళ్లి
ఆత్మతో పరిశుద్ధాత్మ దర్శనం చేస్తూ

ఈ రోజునీ ఉపయోగించే
తెలివిమ్మని అడుగుతూ

నేను కేవలం
మనిషినని గుర్తు చేసుకుంటూ

నాలో నేను
నాతో నేనుకాసేపు

ఉదయాలు చీకట్ల
వలయాలు వక్ర రెఖల వెనక
తీరాల అంచుల కోణాల వెనక
నా ఉద్ద్యేశం వెత్తుకుంటూ

ఆయన దక్షిన హస్తాన్ని స్పృశిస్తూ
నేనెంటో ఎవరో తెలుసుకుంటున్నా
మహిమ రాజ్యానికై సిద్ధపడుతున్నా

--------------- by mercy margaret

సంతోషాన్ని ఫోటో తీసే ప్రయత్నంచేసి ఓడిపోతుంటే 
సంతోషం అన్ని రెట్లెక్కువవుతుంది ఏంటో??

అప్పుడే ఆయన ముఖంవైపు తేరి చూస్తా..!!
కన్నీటికి ప్రతిగా ఆనందతైలాన్ని
బూడిదకి ప్రతిగా పూదండనీ
చేతుల్లోకిస్తూ
నన్ను నుదుటిపై ముద్దు పెట్టుకుంటాడు

ఆయన మృదువైన హస్తాల్లో నన్ను చెక్కుకున్న
తావు చూపిస్తూ
నేనాయనకు ఎప్పుడూ ప్రత్యేకమైన దాన్నని
ప్రేమగా హత్తుకుంటాడు

అప్పుడు ఆకాశం నవ్వుతూ
నన్ను ఆయన్నీ ఫోటో తీస్తుంది
సంతోషం ఆయన రూపమై కనిపిస్తుందప్పుడు నాకు
అచ్చం ఇప్పుడు కనిపిస్తున్నట్టే.........
_________________(17/12/2013)

||దేవుడు ఎక్కడా??||
_________________________

దేవుడు ఎక్కడా??అని అడిగే ప్రతొక్కరికి

దేవున్ని చూపించలేను

అలా అని నవ్వుకోకండి..!!



దేవుడే పంపుంటాడనే

కొన్ని అధ్బుతమైన వాటిని మాత్రం

చూపించగలను

అడగ్గానే సహాయం చేసే చేతులు

కష్టాల్లో భాదల్లో తనివి తీరాఎడ్చేందుకు

సిద్ధంగా ఉండి

హత్తుకునే భుజాలు

కన్నీళ్లను తీసుకుని నవ్వుల్నిచ్చే పెదవులు
ఎప్పుడూ నా చుట్టూ సిద్ధంగా ఉంటాయి

వీటిని మాత్రం ఎవరు ఇవ్వగలరు
దేవుడు తప్పితే..?
_____________(4/12/2013)___

||ప్రతి రోజూ చాలిన నీ కృప || 
_________________________
ప్రతి రోజు ఆ పాత్ర నా ముందు పెట్టబడుతుంది 
నీ ముందు మోకరించి ప్రార్దించిన సమయాన 
ఉచితమైన నీ మహాకృప 
దాన్ని తన చేతుల్లోకి తీసుకుంటుంది

ప్రతి రోజు ఆ పాత్రలో ఏముందో చూడాలని నా ప్రయత్నం
నువ్వేమో నన్ను చూడనివ్వక
ఎత్తైన కొండపైకి నా కాళ్ళను లేడి కాళ్ళలా చేసి
పరుగెత్తిస్తావ్
నీ అధ్బుతమైన సృష్టిని, మహాధ్బుతమైన నీ చేతిపనిని చూపి
నన్ను నివ్వెరపరుస్తావ్
ఆ పాత్రనీకప్పగించాక అది చల్లబడుతుందెందుకని
నేను అడగడం మర్చిపోతాను .

ఈ ఉదయాన్నే కళ్ళు తెరిచే లోపు ఆ పాత్ర నా ముందంచబడి౦ది
నేను నీకు మొదటి కృతజ్ఞతలు చెప్పలేదు
ప్రార్ధనతో నీతో అనుసంధానించబడలేదు
ఆ పాత్రలో ఏముందో చూడాలని కుతూహలం
మూతతీసి చూసా
వేదనకరమైన , మరణకరమైన విషం,
వెంటనే నేను నిన్ను పిలిచాను నీ కృప పరుగెత్తుకొచ్చింది
రోజుటిలాగే నా నుండి అది తీసి ఆ పాత్రని
నీ ప్రేమతో కరుణతో నింపింది.
భయంగా వడలిపోయిన నన్ను హత్తుకుంది.
మరో రోజుకు నీ కోసం నన్ను సిద్ధంచేసింది

_____________ (06/11/2013)_______

||నదిని అన్వేషిస్తూ || by Mercy Margaret
___________________________________
ఒక నది ఇక్కడ ప్రవహిస్తూ ఎప్పుడు పచ్చదనాన్ని కంటూ ఉండేది.
నదినానుకుని నేల, నేల నుండి వేళ్ళు పాకి అడవి, అడవిలో ఆణువణువూ చెట్లు చేమలు
పక్షులు,పశువులు. నిత్యం నూత్న కోలాహలం పచ్చపచ్చగా వినవస్తూ ఉండేది.
చెట్లు పైపైకి పెరిగి ఆకాశంతో అల్లుకుపోయే పందిళ్లను వేసి మేఘాలను కదలకుండా బంధించి
వర్షంతో అందమైన స్నేహం చేసేవి.

నాకిప్పుడు దాహమేస్తుంది . తాగడానికి నీళ్ళు కావాలి. నదిని ఎండిపోజేసిన 
విషవాక్యాలను శపిస్తున్నాను. నది ని ఎడారిగా చేసిన ఆలోచనల రాతలను బహిష్కరిస్తున్నాను.
జీవం ఉట్టిపడే నది కోసం నేను అడవి దాటి అన్వేషిస్తున్నాను.

అడవిలో ఎండిపోతున్న చెట్ల ఆత్మలను దోసిట్లో పట్టుకుని బయలుదేరాను..
విషం చిందించిన అక్షరాలూ క్షరమైయ్యేట్టుచేసే
విషం దొరికే తావు ఎక్కడుందని వెళ్తున్నాను. ఈ అడవిని ఇక్కడే ఒదిలి
నదిని వెతుక్కుంటూ మళ్ళీ పచ్చగా పాలు తేనెలు ప్రవహించే తావులున్న
నదికోసం జీవనది కోసం వెళ్తున్నాను.
నా నీళ్ళు తాగువాడు మరెప్పటికీ దప్పిగొనడన్న నది కోసం వెళ్తున్నాను.

కృష్ణ, గోదావరి తుంగభద్రలు దాటి. గంగా సింధు బ్రహ్మపుత్రలు దాటి.
అమెజాన్, నైలు, మిస్ససిపి నదులు దాటి. సిక్క్వే రెడ్ వుడ్ ,జాగ్ ఫాల్స్ అడవులు దాటి.
మహాగ్రంధాలు, ఉద్గ్రంధాలు దాటి, ఆదియందు ఉన్న వాక్యం వినబడుతున్న శబ్దం వైపు,
కలుగునుగాక అన్న మాటవైపు. భూమి నిరాకారంగా శూన్యంగా ఉండి చీకటి అగాధ జలములపై కమ్మిఉన్నప్పుడు,ఆ జలముల మీద ఆ నది ఆత్మ అల్లాడుచున్న స్థలానికి

నీటి వాగుల కొరకు తృష్ణగొన్న దుప్పినై ..

__________________________

వస్తావా నేస్తం ..!
________________
కొంత మనశ్శాంతి పంపుమందాం శాంతమూర్తిని 
ఎలియా వద్దకు పంపిన కాకితో  మన  కోసం 

ఎక్కడో రాజుకున్న నిప్పు అడవిని తగులబెడుతున్నప్పుడు  
అరణ్యంలో ఆడుకునే 
చిన్ని చిన్ని ఉడతలు కుందేళ్ళు 
చెంగున గెంతే  లేళ్ళు 
ఆ విహ్వలజాలాల ప్రతాపానికి బలి కాక ముందే 
ఓ మేఘం నిండా శాంతిని నింపి మన హృదయారణ్య౦లో 
కురిపించమని వేడుదాం 

తండ్రికి చిక్కకుండా  దాచి చివరి వీడ్కోలు పలికిన
యోనాతాను 
దావీదుతో  పలికిన మాటలు విన్న 
అక్కడి  చెట్లు కొండల వద్దకెళ్ళి 
యదార్ధ  స్నేహపు పలకరింపుల 
తడి తెలుసుకుని వద్దాం 

నుదుటి మీద ముద్దు పెట్టి అప్పగించినా  
అకేల్దమలో యూదా రక్తం ఏమని రోదిస్తుందో 
రుజువులడిగివద్దాం 

వస్తావా.. నేస్తం ... 

క్రిస్టమస్ కోసం సిద్ధపడుతు 
క్రీస్తుని మనసులో నింపుకుందాం
పశుశాలలో వెలిగిన చిరునవ్వులను దోసిలిలో 
పట్టుకుని 
గాయమైన హృదయానికి లేపనంగా రాసుకుందాం  

||జీవనది || By Mercy Suresh Jajjara
________________________
వర్షం పడుతుంది
ఆయనా.. నాతో మాట్లాడుతున్నాడు.
ఎడతెరిపి లేని వానలా కురుస్తున్న ఆయన మాటల్తో 
ఎండిన నేలలా నోరు తెరిచిన హృదయం
దాహం తీర్చుకుంటుంది.

ఆయన మాట్లాడుతున్నాడు వానా పడుతూనే ఉంది
హృదయారణ్యంలోని ప్రతి మూలల్లో మాటలు వర్షిస్తున్నాయి
ప్రతి నేలని చదును చేస్తున్నాయి
ఎండిన ప్రతి మోడు చిగురిస్తు౦ది
రాలిన ఆకుల చోట కొత్త జీవం ఉబుకుతుంది
ప్రతి అణువు చెట్టులా మారి పాటలు పాడుతుంది

వర్షం పడుతుంది, ఆయన ఇంకా మాట్లాడుతూనే ఉన్నాడు
విరిగిన ఎముకలన్నీ ఆ మాటలు వింటున్నాయి

ఆయన మాట్లాడాడు లేచి బయటికి రమ్మన్నాడు
శవం ఇప్పుడు శవం కాదు. మళ్ళీ జీవం ఉన్న మనిషి
కరిగిపోయిన ప్రతి కన్ను చూసేలా ఆయన మాట్లాడాడు
చనిపోయిన ప్రతీది నిత్యత్వం పొందుతుంది
ఆయన మాట్లాడుతున్నాడు
వర్షంలా
చినుకుల్లా కురిసే మాటలు నదులయ్యాయి
ఆ నది
జీవనది
ప్రవహిస్తూ నన్ను ముంచింది

అదో ... చూడు ఇప్పుడు
నీవైపే..
నీవైపే వస్తుంది.
____________ (23/10/2013)__________

|| కాంతి కౌగిలిలో || by Mercy Margaret 
------------------------------------
-'చీకటి ప్రదేశాలు దాటెల్లాలి 
నాకొంచెం వెలుగివ్వు' 
అడిగా ఆ కాటి కాపరిని 

కొంచెం వెలుగో, కాగడ వెలుగో ఎందుకు ? 
ఆయన చేతిలో నీ చేయి వెయ్యి 
చీకటనుకున్నదంతా 
ఏమవుతుందో చూడు అని సమాధానం

మేకులు దించిన చేయి నా వైపు చాపి
ఆయన ప్రశాంతంగా నవ్వాడు

ఆ కళ్ళలోని ఆదరణ చూస్తూ
అతని చేతిలోకెళ్ళిన నా చేయి

వెంటనే ఆ నిమిషం
నిజ ద్రాక్షావల్లిలో అంటుకట్టబడ్డట్టు
ఎండిన నరాల్లో ప్రవహించిన జీవం
మరణాన్ని దాటాను
నేనిప్పుడు వెలుగుకు సొంతమయ్యాను .
________( 11/10/2013)_______

||పొరలు రాలిన క్షణం || by Mercy Margaret 
-----------------------------------------------
కళ్ళు వెలిగింపబడ్డప్పుడు 
ఇప్పుడు చూస్తున్నాను 
అపరిశుద్ధత జాడ లేని పరిశుద్ధ స్థలాల్ని 
అంతే కాదు 

ఏవి సత్యమైనవో , మాన్యమైనవో,న్యాయమైనవో, 
ఏవి పవిత్రమైనవో, రమ్యమైనవో, 
ఖ్యాతిగలవో
వాటిని

ఒక సారి అటు పక్కగా చూసా
నడిచిన దారుల్లో నా ఉనికి తెలుసుకోవాలని

గాడాంధకార లోయ, ఎముకల లోయలో గుండా నడిచిన ఆనవాళ్ళు
శ్రమలోయల్లో గుండా గ్రుడ్డిగా నడిచొచ్చిన
దాఖలాలు
దారి లేని కీకారణ్యాల్లో, చనిపోయిన జంతు శవాలపైగా
హతుల రక్త సిక్త దేహాలమడుగులో పడిన
అడుగుల ముద్రలు , కనబడలేని దుర్గంధ వాతావరణాలు
చీకటి అంటుకున్న పాదాలు వెలుగులో స్పష్టంగా కనబడుతున్నప్పుడు

కోల్పోయిన సమయాన్ని గూర్చిన చిరు చింతన
ఇన్నాళ్ళు ఆలస్యం ఎందుకు చేసానని ?
అయినా
పర్లేదు దమస్కు మార్గానికి ఇపుడు
చేరానన్న ఆనందం

రాలిపోయిన పొరలు మరెప్పుడు కనిపించవిక
అదో
ముగిసిన యుద్ధం
కడ ముట్టించబోతున్న పరుగు పందెం
జీవకిరీట౦ పట్టుకొని నిరీక్షిస్తున్న దీపస్థంభం
_________________(8/10/2013)____

|| ఓ సంభాషణ || by Mercy Margaret
-----------------------------
కళ్ళ లోంచి రెండు కన్నీటి చుక్కలు రాలి పడబోతుండగా
నువ్వు నీ చేతుల్లోకి వాటిని తీసుకోవడంతో
నీ కళ్ళలోకి చూసాను
చిరు నవ్వు నవ్వావు

ఎందుకు నవ్వడం నా పరిస్థితి నీకు తెలియదు
ఇప్పటికి నన్ను ఒంటరిగా వదిలేయ్ అన్నాను
నువ్వు మళ్ళీ నన్ను చూసి అంతే జాలిగా నవ్వావ్ 

నువ్వూ ఒకసారి ఏడ్చావ్ మరిచిపోకు అన్నాను
అవును అంటూ తలూపావ్
కళ్ళు ఒకసారి మూసుకోమని ఏ౦ కనిపిస్తుంది అని అడిగావ్
చీకటి అన్నాను ..
ఇప్పుడు అని అంటే లోకం అన్నాను

వెంటనే నువ్వు నా ముందుగా నిలబడి "నేను కనబడుతున్నాను "
అంటావ్ అనుకున్నానని మళ్ళీ దయగా నవ్వుతూ
నీ రెండు చేతులు తెరిచావ్ నా కన్నీటి చుక్కలు ముత్యాలయ్యాయి
కాని

నాకు గుర్తుంది ఆ ముత్యం నీ అరచేతి గాయంలో ఇరుక్కోవడం
వెంటనే నా దుఖానికి కారణం ఆవిరైయ్యింది
నీ రెండు చేతులను తెరిచి ముద్దాడాను
ఆ స్పటిక సముద్ర తీరానా
జీవ వృక్షపు నీడలో ఫలాలు తినడానికి రమ్మన్నావ్
అంతే

మోకరిల్లాను ఆ పాదాలపై చీలలు చేసిన గాయాలు
నన్ను చూసి నవ్వాయి
నేను మాత్రం వాటిని ఎప్పటికి వదల దలుచుకోలేదు
అందుకే
పరదైసులోకి రావడానికి నీ అడుగుల జాడల్లో ఇలా పయనమై వచ్చాను

--------------------------(30/9/2013)--------

|| ప్రార్థన మందిరం || by Mercy Margaret
----------------------
యేసు - "నా మందిరము ప్రార్థన మందిరమనబడును అని వ్రాయబడియున్నది, అయితే మీరు దానిని దొంగల గుహగా చేసెడివారనెను ....."
ఒక్కసారి ఇదే మాటను 
ఆకాశం నుంచి వినిపించేలా ఘర్జించయా .. 
అప్పుడైనా మా వెన్నులో ఒణుకు పుట్టి 
నీ వైపు కనులెత్తుతామ్ 

ఒక సారి సంఘాల పునాదులు దద్దరిల్ల జేయయా
చిన్నల మొదలుకొని పెద్దల వరకు 
వినయ మనస్కులమై నీలా మారేందుకు
అహానికి సిలువేస్తాం

ఒక్కసారి మా కళ్ళను నీ రక్తంలో ముంచయా
నీ దేహం మా కోసం మోసిన
పాపాల్ని చూసి సిగ్గుపడతాం

నీ రక్తం కార్చగా కట్టిన సంఘాలపై
నీ ఆత్మాగ్ని కురిపించు
ఆరిపోయిన మా ఆత్మ దీపాలు వెలిగించుకుంటాం
బుద్దిగల కన్యకల్లో ఒకరమవుతాం ....
---------------- (15-4-2013)---------

|| తన నవ్వులో దాగి || by mercy margaret
--------------------------------------------------
ఎలా శిక్షించానో చూడు అని లోకం నవ్వుతుంది 
భలేగా జరిగిందే అని లోకులు నవ్వుతున్నారు 

హలో.....!!అని 
ఆకాశ మహాకాశాల పైగా ఆయన 
వాళ్ళందరిని పిలిచి పిచ్చివాళ్ళారా అని 
ఒక నవ్వు నవ్వాడు అంతే 

ఇంకేముంది
ఆయన సార్వభౌమత్వం కన్నా గోప్పదేముందని
నేను నా పరిస్థితులను చూసి చులకనగా నవ్వి
ఆయన నవ్వులో దాక్కున్నా
అంతే

వెక్కిరింతగా నా చుట్టూ చీకటి రాల్చిన నలుపు
ఆయన నవ్వుకు భయపడి పరుగెత్తింది
ఏడ్చి ఏడ్చి దెబ్బ తిన్న కంటి నరాలలోకి
జీవం పొంగి కొత్త దృష్టితో ఆయనను చూసేలా చేసింది

చాలు ఈ ధైర్యం
ఇప్పుడు లోకం/అబద్ధానికి జనకుడు నా కాళ్ళ కింద
నేను నా క్రీస్తుతో తన నవ్వులోని అణువణువులో
వెలుగుతూ "నా ప్రాణంతో" చేయి పట్టుకుని ఎగిరే
సీతాకోక చిలుక ..!!
-------------- (12/4/2013)-------

Assurence 
-------------

జారి పోతుందేమో బొట్టు బొట్టుగా 
నా దోసిలిలో ఉంటే జీవితం 
అందుకే నీ దోసిలిలోనే ఉండనివ్వు 

నేను లాక్కోడానికి ప్రయత్నించి 
అప్పుడప్పుడు నిన్ను విసిగించినా 
నా మీద జాలిపడకు 
నీకు అసలే దయాదాక్షిణ్యం , కరుణాజాలి ఎక్కువ 
దీర్ఘశాంతం గురించి చెప్పక్కర్నే లేదు

నీ చేతుల్లోనే ఉండి  కిందకు చూస్తూ 
నా కళ్ళు కింద ఉన్న వాటి గురించి ఆశించొచ్చు సుమా 
ఒకవేళ అలా చూసినా నువ్వు నన్ను దగ్గరగానే 
హత్తుకుంటావ్ ఎందుకంటే నువ్వు 
నా యేసువు  కదా !!

మనుషుల చేతిలో పడేకన్నా 
నేను నీ చేతుల్లో పడడం మేలు కదూ 
భయం పిరికితనం నిన్ను నా కళ్ళకు చిన్నగా 
చూపించే ప్రయత్నం చేసేప్పుడు 
నా హృదయపు కళ్ళను , నా విశ్వాసపు చెవులను 
పెద్దగా తెరువు 
అయినా నీ ముందు నిలిచే సత్తా ఎవరికుందిలే ?
దూళి అణువంత ఈ విశ్వం నీ సృష్టిలో 
అందులో నేను నాపై రాళ్ళు వేసే వాళ్ళు ఎంతలే ?

|| ఆయన పాదాలు ముద్దాడా !! ||by Mercy Margaret
----------------------------------------
నేను ముద్దు పెట్టుకున్నాను
అవును నేను ముద్దుపెట్టుకున్నాను
ఆయన పాదాలు
పరిసయుడైన సీమోను ఇంట్లో

అందరు చూసే వెలిచూపులను దాటుకుని
సమూహం మధ్యలోంచి దారి చేసుకుని
ఆ ఇంట్లోకి వెళ్తుంటే
ఎన్ని గుస గుసలో నా గురించి
ఎన్ని తీర్పులో వారి స్వనీతి పెదవులనుంచి

వెనక నుండి భోజనానికై కూర్చున్న
ఆయన పాదాల్ని చూసి ముట్టుకోగానే
మురికికూపమైన హృదయంలో శుద్ధీకరణ,
పశ్చాత్తాపపు కొలిమిలో కాల్చబడుతున్నట్టు హృదయం
కడగబడుతున్న ఆలోచనలు కన్నీరే దానికి సాక్ష్యం
ఆగకుండా కన్నీరు .... ఆయన పాదాలపై ప్రవహిస్తూ తడుపుతూ

ఆయన తప్ప అక్కడున్న వారి
చూపులు మాటల , ప్రశ్నల సందేహాల
కొక్కాలు, కొరడాలు నాపై జులుం చేస్తున్నా
నా ముందున్న రక్షణ , నా నిరీక్షణ నన్ను
చీకటి లోంచి వెలుగువైపు దాటిస్తున్నట్టు౦టే
సమాధానం , విడుదల విస్తార జలప్రావాహంలా నన్ను ముంచేస్తుంటే
నాకు ఆయన పాదాలు మాటలు తప్ప ఏమి కనిపించవు విన్పించలేవే!!

నా కన్నీటితో పాదాలు కడిగి
తల వెంట్రుకలతో తన పాదాలు తుడిచి
ఆయన పాదాలు ముద్దు పెట్టుకుని
ఇంతవరకు నావైపు ఆకర్షించేందుకు వాడిన అత్తరు మొత్తం
నాకింకవసరం లేదని ఆయన పాదాలకు పూసా

ఆయన నా విశ్వాసాన్ని ఘనపరిచాడు
నా హృదయాన్ని సమాదానపు ఊటలతో క్రొత్తగా చేసి
నన్ను నన్నుగానే స్వీకరించి
పాపాత్మురాలని నన్ను తరిమే మాటలనుంచి నాకు విముక్తినిచ్చి
యేసు అనే తన పేరుని
నా జీవితంలో యదార్ధం చేసాడు.
--------------------------- (27/2/2013)---------

 

‎||దేవుడు గీసిన నా ప్రణాళిక || by Mercy Margaret 
----------------------------------------------------
నేను 
తన రెక్కల నీడలో దాగినప్పుడు 
ఏ గ్రద్ద నా కోసం చూస్తేనేమి ?
ఏ పాము నన్ను మ్రింగాలని తిరగాడితే నేమి ? 

ప్రశ్నల ఉరిబిగించి గొంతును కోసి 
పొడిచి పొడిచి 
నా రక్తాన్ని పరిశుద్ధమా ?? అపరిశుద్ధమా ? అని 
పరిక్షిమ్చాలని చూస్తే 
హేబెలు రక్తం మొరపెట్టినట్లు 
భూమిలో నుంచి కూడా 
నిస్పక్షపాతి అయిన దేవుని న్యాయం చేయాలని 
అడగడం మానలేను కదా 

ఇంతకు 
నీ భాద ?
నా ఆత్మ గురించా ? లేక 
దేవుని చిత్తం తప్పు అని నిరూపించి ఓడిపోవడం గురించా ?
నా అడుగులు ఇంకా ఆయన బండపైన స్థిరంగా ఉన్నాయి ఏమిటని 
అలజడి రేగుతున్న నీ హృదయాన్ని ఎలా నిమ్మళింప చేయాలనా ?
జీవమిచ్చిన దేవుడు గీసిన నా ప్రణాళిక నీకు రుచించక పొతే 
నేనేం చేయాలి ??

పర్లేదు 
నీలాంటి వాళ్ళు నాకు అవసరమే 
ఇంకా ఇంకా దగ్గరగా యేసును చూడడానికి 
నాకు అవకాశం ఇస్తున్నావ్ !!

శోదింప బడిన మీదట 
నేను సువర్ణంగా మారుతూ 
నీకు కృతజ్ఞత చెబుతాలే 
నేను సువర్ణం అవడానికి నువ్వు పూనుకోవడం 
గుర్తు చేసుకుని 
రెండు మాటలు నీ గురించి దేవునికి కూడా 
విన్నవిస్తాలే !!
-------------------------( 10/2/2013 )---------

||ఒక్కసారి ఆగు || by mercy margaret
---------------------------------------------
1.
ఎందుకు నడవడం ??
దుష్టుల ఆలోచనల ప్రకారం
ఎందుకు నిలబడడం ??
పాపులు వెళ్ళే ఆ మార్గంలో
ఎందుకు కూర్చోవడం ??
అపహాసకులు ఎగతాళి చేసే వాళ్ళు కూర్చుని
పారించే ఆ మురికి స్థలాల్లో
ఎంత ఆనందం వస్తుందని ?
ఎంతటి హాయి నీ హృదయాన్ని నింపుతుందని ??

2.
అహోరాత్రము
దేవుని లేఖనాలను , వాక్యాన్ని , ధర్మశాస్త్రాన్ని
పఠించి , ధ్యానించి
దానిలో ఆనందించు
అప్పుడు నీవు ధన్యుడవవుతావ్

3.
ధన్యుడవుగా
ఆ ధన్యత ఎలా ఉంటుందో తెలుసా ??
నీటి కాలువ ప్రక్కనే నాటబడి
ఎప్పుడూ పచ్చగా వాడిపోని ఆకులతో ,
ఏ కాలపు పండ్లు ఆ కాలంలో కాస్తూ
అన్ని పనుల్లో సఫలత పొందే
చెట్టులా

4.
కాని
దుష్టుడు ??
పొట్టులా
గాలికి చెదరగొట్ట బడే వాడిలా ఉంటాడు

5.
వీళ్ళకు
న్యాయవిమర్శలో నిలవలేరు
నీతిమంతుల కోసం నిర్దేశించబడ్డ సభలో
పాపులకు చోటు లేదు

6.
గుర్తుంచుకో
నీతి మార్గంలో నడిచే వారిగురించి యెహోవాకు తెలుసు
అలాగే
దుష్టత్వపు మార్గంలో నాశనానికి వెళ్ళే వారిగురుంచి కూడా ..
-------------------------------------------------------
(" ఒకటవ (1)కీర్తన " మూలం )
-------------------------------------------------------